សហរដ្ឋអាមេរិក៖ ជាមួយសារដ៏សំខាន់ដែលបានលើកឡើងថា "ការការពារលទ្ធិប្រជាធិបតេយ្យគឺមានសារៈសំខាន់ជាងមុខតំណែងអ្វីទាំងអស់" ដោយលោកប្រធានាធិបតីអាមេរិក ចូ បៃដិន (Joe Biden) បានថ្លែងបែបនេះនៅក្នុងការិយាល័យប្រធានាធិបតីរបស់លោកនាថ្ងៃទី២៤ ខែកក្កដា ដែលនេះគឺជាមូលហេតុសំខាន់បំផុតក្នុងការសម្រេចចិត្តបោះបង់ការប្រជែងតំណែងប្រធានាធិបតីអាណត្តិថ្មី ព្រមទាំងបង្វែរការគាំទ្ររបស់លោកទៅលើអនុប្រធានាធិបតីរបស់លោកគឺ លោកស្រី កាម៉ាឡា ហារីស ជាបេក្ខភាពប្រជែងតំណែងប្រធានាធិបតីអាណត្តិថ្មីរបស់គណបក្សប្រជាធិបតេយ្យ។
គួរបញ្ជាក់ថា សុន្ទរកថានេះគឺជាលើកដំបូងបង្អស់ដែលសាធារណជនបានដឹងអំពីមូលហេតុនៃការមិនចូលរួមប្រជែងតំណែងប្រធានាធិបតីអាណត្តិថ្មីរបស់លោកប្រធានាធិបតី Joe Biden សម្រាប់ការបោះឆ្នោតដែលធ្វើឡើងនៅថ្ងៃទី០៥ ខែវិច្ឆិកានេះ ដែលវាហាក់ជារឿងដ៏គួរឱ្យភ្ញាក់ផ្អើលមួយផងដែរ បន្ទាប់ពីប៉ុន្មានសប្តាហ៍មុន លោកទើបតែបានអះអាងថា លោកជាគឺបេក្ខភាពដ៏សក្ដិសមបំផុតសម្រាប់ការប្រជែងតំណែងប្រធានាធិបតីជាមួយលោក ដូណាល់ ត្រាំ (Donald Trump)។
លោក បៃដិន ថ្លែងថា៖ "ការការពារលទ្ធិប្រជាធិបតេយ្យគឺសំខាន់មុខតំណែងអ្វីទាំងអស់"។ លោកបន្តថា៖ "លោកគោរពកោតសរសើរនូវការិយាល័យ (ប្រធានាធិបតី) នេះ ប៉ុន្តែលោកស្រឡាញ់ប្រទេសជាតិទាំងមូលជាង"។ បេក្ខភាពរបស់លោក Biden បានប្រឈមមុខនឹងវិបត្តិទំនុកចិត្តពីសមាជិកគណបក្សប្រជាធិបតេយ្យ ក្រោយលោកធ្វើមិនបានល្អក្នុងកិច្ចពិភាក្សាដេញដោលទល់នឹងលោក Trump កាលពីសប្តាហ៍មុន និងជាពិសេសនៅពេលដែលលោកឈានដល់វ័យ ៨១ឆ្នាំទៅហើយ ព្រមទាំងសុខភាពក៏មិនសូវជាមានលក្ខណៈល្អប្រសើរផងនោះ។
ក្រោយការប្រកាសមិនបន្តក្នុងការប្រជែងតំណែងប្រធានាធិបតីអាណត្តិថ្មីកាលពីថ្ងៃអាទិត្យ លោក Biden ថ្លែងថា លោកបានសម្រេចចិត្តហើយថា វិធីដ៏ល្អបំផុតគឺការទុកឱកាសសម្រាប់មនុស្សជំនាន់ថ្មី ដែលលោកសង្កត់ធ្ងន់ថាលោកចង់ទុកកន្លែងសម្រាប់សំឡេងថ្មី និងអ្នកដែលមានវ័យក្មេង"។ លោកបញ្ជាក់ថា៖ "នេះគឺជាវិធីល្អបំផុតសម្រាប់ឱ្យមានការបង្រួបបង្រួម និងឯកភាពជាតិ"។
ក្នុងសុន្ទរកថានេះដែរ លោក Biden ក៏បានសន្យាថា លោកនៅតែបន្តផ្តោត និងបំពេញតួនាទីជាប្រធានាធិបតីក្នុងអាណត្តិដែលសេសសល់របស់លោកឱ្យបានល្អបំផុត ពោលគឺរហូតដល់វេលាថ្ងៃត្រង់ ថ្ងៃទី២០ ខែមករា ឆ្នាំ២០២៥។ លោកក៏បានថ្លែងថា លោកនឹងព្យាយាមបំពេញការងារដើម្បីបញ្ចប់សង្រ្គាមរវាងអ៊ីស្រាអែល និងក្រុមហាម៉ាសនៅតំបន់ហ្គាហ្សា, ជំរុញការគាំទ្ររបស់រដ្ឋាភិបាលដើម្បីឈានទៅសម្រេចការព្យាបាលជំងឺមហារីក និងអំពាវនាវឱ្យមានកំណែទម្រង់តុលាការកំពូលផងដែរ៕
